Kulla e Kadri Hysenit në Ashlan

Kjo kullë, në aspektin arkitektonik. është paksa e veçantë me disa elemente që nuk i hasim te kullat e tjera. Sipas konstruksionit që ka, mund të kuptojmë se nuk janë vendosur kafshët shtëpiake në katin përdhesë, derisa dihet se pothuajse në të gjitha kullat shqiptare, kafshët shtëpiake janë mbajtur në katin përdhesë, apo në katin e parë, siç njihet në popull. Bazamenti i kullës është në formë katrore dhe është i përbërë prej dy kateve, me dritare të hapura në formë katërkëndëshi, të përshtatur me kohën. Ajo ka pasur në të katër anët edhe frengji apo dritare të vogla (d.m.th. këto e specifikonin nga kullat e tjera), që përveç se kanë shërbyer për mbrojtje në rast sulmi, kanë qenë edhe për ndriçim e ventilim (ajrosje) të kullës.

Sipas të gjitha rrethanave dhe kujtesës së popullatës së kësaj ane, ajo është ndërtuar në shekullin XIX, më sakt në gjysmë e dytë të këtij shekulli. Specifikë e kullës në Ashlan është se dyert e drurit i ka të mbuluara me tjegulla (qeremide). Kjo kullë ka pasur edhe murin rrethues të oborrit, i ndërtuar po ashtu nga guri, sikurse edhe rrethi i pusit (bunarit) që është punuar nga guri.

Burimi: Dr.sc. Izet S. Miftari