Kalaja e Strofcit ose Gjyteti i Strofcit

Kalaja e Strofcit ose Gjyteti i Strofcit është një fortesë antike, monument i trashëgimisë kulturore në Strofc, Vushtrri, Kosovë. Ky monument është i kategorisë “Arkeologjik”, i miratuar me numër 0301-133/88.

Në fshatin Strofc gjendet kalaja e njohur me emërtimin Gradina, lokalitet ky arkeologjik me indikacione të shfrytëzimit që nga parahistoria, antika e vonë dhe mesjeta e hershme. Në shpatet e kodrës, vërehen mure të vendosura në formë të kaskadave, që shkojnë deri lart në majë të kodrës. Këtu edhe në ditët e sotme, vërehen gjurmët e kullave dhe bedenave apo mureve rrethuese të kësaj fortese, me trashësi deri në 2 metra. Sipas konfiguracionit të terrenit dhe gjurmëve të evidentuara, supozohet se këtu gjendej një objekt me karakter kulti që mbase u ka shërbyer banorëve të saj lokalë.